هشام جمال: طلبت إيد ليلى من والدها في النادي الأهلي.. وكان له طلب واحد مني

كشف الفنان هشام جمال، كواليس تقدمه لخطبة الفنانة ليلى أحمد زاهر من والدها، وذلك خلال لقائه في برنامج صاحبة السعادة.

وقال هشام جمال: أنا إتقدمت لزيزو في النادي الأهلي، علشان الناس تعرف أد إيه أنا أهلاوي.

وتابع: كان عندنا حاجة وإتقابلنا في النادي، وبعد ما خلصنا الموضوع كان رايح عزاء وأنا رايح نفس العزاء، وقعدنا نتغدى في النادي مع بعض، وفجأة خطفته بسؤال هنعمل إيه في موضوع ليلى.

وأضاف: أول سؤال سأله والدها كان الموضوع بدأ إمتى، فقلت له متخافش أنا معملتش أي حاجة تتخطى حدود الأدب والاحترام، وإتكلمنا 4 ساعات، وبعد العزاء كملنا كلام لغاية الساعة 2 الصبح.

أوضح هشام جمال أنه حرص على طمأنة الفنان أحمد زاهر على النقطة الأهم بالنسبة له قائلا: حكيت له كل حاجة ممكن تبقى مهم يعرفها، وليه إحساسي كده ناحية بنتك، وليه شايف إنك المفروض توافق، وطمنته على حاجات كثيرة.

وأكمل: هو مشكلته الرئيسية إنه بيحب بناته جدا وخايف عليهم، وطمنته بمنطق متخافش عليها.

وردا على سؤال ماذا طلب منه والد ليلى، قال هشام جمال: في قراءة الفاتحة كان له طلب وحيد، عايزك تاخد بالك من بنتي.